你不可不知的:5個颱風冷知識…

颱風海馬來襲,八號風球,唔洗番工番學(好野!)…
但係關於颱風你又知幾多呢?

1. 你知道嗎?北半球嘅颱風都係逆時針旋轉咖!
因為地球自轉會產生偏向力令地球上移動嘅物體有偏向嘅趨勢,影響地球嘅風向係北半球會偏右,係南半球會偏左,呢種力叫「科里奧利力」或者「科氏力」(Coriolis Force),所以颱風係北半球係逆時針旋轉,係南半球係順時針旋轉。

2. 點解打風之前天氣會咁熱又有煙霞呢?
因為當颱風係香港附近海域接近,颱風覆蓋範圍嘅空氣會上升,而乾燥的空氣會係佢周圍下沉,空氣懸浮物會因較小嘅濕氣依附而容易由地面加熱升到空中,同時下沉嘅空氣會將空氣罩著,令近地面嘅風勢微弱、熱氣積聚,所以天氣就會較熱同有煙霞。

3. 颱風正中心竟然無風
颱風係一團旋轉嘅空氣,範圍好大,而佢嘅中心叫做風眼。由於風眼外嘅空氣高速旋轉,係離心力作用下,外面嘅空氣好難入到風眼,所以風眼裏面幾乎無風,而且雲層稀薄,天氣好好。

4. 颱風係海到會不停增強,一上岸就會無咗影,點解呢?
因為其實颱風不斷轉動會消耗能量,而佢嘅熱量正正就係源自溫暖嘅海水,所以係溫暖嘅海上面,颱風會增強,但係一上到無乜水嘅陸地,就會漸漸減弱。

5. 成日都聽到個啲咩熱帶低氣壓、強颱風…其實係啲咩?
呢啲其實都係颱風/熱帶氣旋嘅級別。咁其實唔同嘅國家或者地區都會有唔同嘅颱風分類方法,如果用香港為例子,颱風就跟住佢嘅強度分為6級,由弱到強依次序:熱帶低氣壓、熱帶風暴、強烈熱帶風暴、颱風、強颱風、超強颱風,而幫我地爭取到日假嘅颱風海馬就係一個超強颱風(平均風速達每小時220公里)。

Admin ThatGuy

那個傢伙,以科學為樂,科維編輯。

發表評論